1ܡܘܼܚܸܒ̈ܝܼ؛ ܠܟܠܵܝܗܝ ܪ̈ܘܼܚܹܐ ܠܵܐ ܗܲܡܸܢܝܼܬܘܿܢ؛ ܐܸܠܵܐ ܗܵܘܹܝܬܘܿܢ ܒܸܦܪܵܫܵܐ ܪ̈ܘܼܚܹܐ؛ ܐܸܢ ܡ̣ܢ ܐܲܠܵܗܵܐ ܝ݇ܢܵܐ. ܣܵܒܵܒ ܪܵܒܵܐ ܢܒܼܝܼܹ̈ܐ ܕܲܓܵܠܹ̈ܐ ܦܠܸܛܠܗ݇ܘܿܢ ܒܐܵܗܵܐ ܥܵܠܡܵܐ. 2ܒܐܵܗܵܐ ܝܵܕܥܝܼܬܘܿܢ ܪܘܼܚܹܗ ܕܐܲܠܵܗܵܐ؛ ܟܠ ܪܘܼܚܵܐ ܕܡܵܘܕܝܼܵܐ ܕܝܼܫܘܿܥ ܡܫܝܼܚܵܐ ܐ݇ܬܹܐܠܹܗ ܒܒܸܣܪܵܐ؛ ܡ̣ܢ ܐܲܠܵܗܵܐ ܝ݇ܠܵܗ̇. 3ܘܟܠ ܪܘܼܚܵܐ ܕܠܵܐ ܡܵܘܕܝܼܵܐ ܕܝܼܫܘܿܥ ܐ݇ܬܹܐܠܹܗ ܒܒܸܣܪܵܐ؛ ܠܹܐ ܝ݇ܠܵܗ̇ ܡ̣ܢ ܐܲܠܵܗܵܐ ܘܐܵܗܵܐ ܡ̣ܢ ܐܲܢܛܝܼܟܪܝܼܣܛܘܿܣ ܝ݇ܠܵܗ̇؛ ܗ̇ܘ ܕܫܡܸܥܠܵܘܟܼܘܿܢ ܕܐܵܬܹܐ؛ ܘܐܵܕܝܼܵܐ ܗܲܪ ܓܵܘ ܥܵܠܡܵܐ ܝ݇ܠܹܗ. 4ܐܝܼܢܵܐ ܐܲܚܬܘܿܢ ܡ̣ܢ ܐܲܠܵܗܵܐ ܝ݇ܬܘܿܢ؛ ܒܢܘܿܢܹ̈ܐ؛ ܘܓܼܠܝܼܒܵܝܠܵܘܟܼܘܿܢ؛ ܣܵܒܵܒ ܒܘܼܫ ܓܘܼܪܵܐ ܝ݇ܠܹܗ ܗ̇ܘ ܕܒܝܼܵܘܟܼܘܿܢ ܡ̣ܢ ܕܗ̇ܘ ܕܒܥܵܠܡܵܐ؛ 5ܘܐܲܢܹܐ ܡ̣ܢ ܥܵܠܡܵܐ ܝ݇ܢܵܐ؛ ܣܵܒܵܒ ܕܐܵܗܵܐ ܡ̣ܢ ܥܵܠܡܵܐ ܗܲܡܙܘܼܡܹܐ ܝ݇ܢܵܐ؛ ܘܥܵܠܡܵܐ ܒܸܫܡܲܥܝܵܝܗܝ ܝ݇ܠܹܗ. 6ܐܲܚܢܲܢ ܡ̣ܢ ܐܲܠܵܗܵܐ ܝ݇ܘܵܚ؛ ܘܗ̇ܘ ܕܝܵܕܹܥ ܠܐܲܠܵܗܵܐ ܟܹܐ ܫܵܡܹܥܠܲܢ. ܗ̇ܘ ܕܠܹܐ ܝ݇ܠܹܗ ܡ̣ܢ ܐܲܠܵܗܵܐ؛ ܠܹܐ ܫܵܡܹܥ ܠܲܢ. ܗܲܪ ܒܐܵܗܵܐ ܦܲܪܡܘܼܝܹܐ ܝ݇ܘܵܚ ܠܪܘܼܚܵܐ ܕܣܲܪܲܣܬܘܼܬܵܐ؛ ܘܠܪܘܼܚܵܐ ܕܚܸܠܛܘܼܢܝܘܼܬܵܐ. 7ܡܘܼܚܸܒ̈ܝܼ؛ ܡܲܚܸܒܲܚ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܣܵܒܵܒ ܚܘܼܒܵܐ ܡ̣ܢ ܐܲܠܵܗܵܐ ܝ݇ܠܹܗ؛ ܘܟܠ ܡ̇ܢ ܕܡܲܚܸܒ ܡ̣ܢ ܐܲܠܵܗܵܐ ܗ݇ܘܹܐܠܹܗ؛ ܘܟܹܐ ܝܵܕܹܥ ܠܐܲܠܵܗܵܐ. 8ܟܠ ܕܠܵܐ ܡܲܚܸܒ ܠܹܐ ܝܵܕܹܥ ܠܐܲܠܵܗܵܐ؛ ܣܵܒܵܒ ܐܲܠܵܗܵܐ ܚܘܼܒܵܐ ܝ݇ܠܹܗ. 9ܒܐܵܗܵܐ ܦܸܫܠܹܗ ܝ݇ܕܸܥܝܵܐ ܚܘܼܒܹܗ ܕܐܲܠܵܗܵܐ ܕܠܟܸܣܠܲܢ؛ ܕܠܒܪܘܿܢܹܗ ܝܼܚܝܼܕܵܝܵܐ ܫܘܼܕܸܪܹܗ ܐܲܠܵܗܵܐ ܠܥܵܠܡܵܐ؛ ܕܚܲܝܵܚ ܒܐܝܼܕܹܗ. 10ܒܐܵܗܵܐ ܝ݇ܠܹܗ ܚܘܼܒܵܐ؛ ܠܹܐ ܗَܘܵܐ ܕܐܲܚܢܲܢ ܡܘܼܚܸܒܠܲܢ ܠܐܲܠܵܗܵܐ؛ ܐܸܠܵܐ ܕܗ̇ܘ ܒܓܵܢܹܗ ܡܘܼܚܸܒܠܹܗ ܐܸܠܲܢ؛ ܘܫܘܼܕܸܪܹܗ ܠܒܪܘܿܢܹܗ ܚܘܼܣܵܝܵܐ ܡܒܵܕܵܠ ܕܚܛ̈ܝܼܵܬܲܢ. 11ܡܘܼܚܸܒ̈ܝܼ؛ ܐܸܢ ܗܲܕܟܼܵܐ ܐܲܠܵܗܵܐ ܡܘܼܚܸܒܠܹܗ ܐܸܠܲܢ؛ ܐܘܼܦ ܐܸܠܲܢ ܘܵܓ̰ܸܒ ܝ݇ܠܵܗ̇ ܠܡܲܚܘܼܒܹܐ ܚܲܕ݇ ܠܗ̇ܘ ܐ݇ܚܹܪ݇ܢܵܐ. 12ܠܐܲܠܵܗܵܐ ܐ݇ܢܵܫܵܐ ܗܸܟ̰ ܠܹܐ ܝ݇ܠܹܗ ܚܸܙܝܵܐ. ܐܝܼܢܵܐ ܐܸܢ ܡܲܚܸܒܲܚ ܚܲܕ݇ ܠܗ̇ܘ ܐ݇ܚܹܪ݇ܢܵܐ؛ ܐܲܠܵܗܵܐ ܒܝܼܲܢ ܟܹܐ ܥܲܪܩܸܠ؛ ܘܚܘܼܒܹܗ ܟܹܐ ܦܵܐܹܫ ܡܘܼܟܡܸܠܵܗ̇ ܒܝܼܲܢ. 13ܘܒܵܐܗܵܐ ܒܝܼܕܵܥܝܵܐ ܝ݇ܘܵܚ ܕܒܝܼܹܗ ܥܲܪܩܘܼܠܹܐ ܝ݇ܘܵܚ؛ ܘܗ̇ܘ ܒܝܼܲܢ ܥܲܪܩܘܼܠܹܐ ܝ݇ܠܹܗ؛ ܕܡ̣ܢ ܪܘܼܚܹܗ ܝܸܗ݇ܒܼܸܠܹܗ ܐܸܠܲܢ. 14ܘܐܲܚܢܲܢ ܚܙܹܐܠܲܢ؛ ܘܒܝܼܵܗ݇ܒܼܵܐ ܝ݇ܘܵܚ ܣܵܗܕܘܼܬܵܐ؛ ܕܒܵܒܵܐ ܫܘܼܕܪܹܗ ܠܒܪܘܿܢܹܗ ܦܵܪܘܿܩܵܐ ܠܥܵܠܡܵܐ. 15ܟܠ ܕܡܵܘܕܹܐ ܕܝܼܫܘܿܥ ܒܪܘܿܢܹܗ ܕܐܲܠܵܗܵܐ ܝ݇ܠܹܗ؛ ܐܲܠܵܗܵܐ ܒܝܼܹܗ ܟܹܐ ܥܲܪܩܸܠ؛ ܘܗ̇ܘ ܒܐܲܠܵܗܵܐ. 16ܘܐܲܚܢܲܢ ܝ݇ܕܸܥܠܲܢ ܘܗܘܼܡܸܢܲܢ ܚܘܼܒܵܐ ܕܐܝܼܬ ܠܹܗ ܐܲܠܵܗܵܐ ܠܟܸܣܠܲܢ. ܐܲܠܵܗܵܐ ܚܘܼܒܵܐ ܝ݇ܠܹܗ؛ ܘܟܠ ܕܥܲܪܩܸܠ ܒܚܘܼܒܵܐ؛ ܒܐܲܠܵܗܵܐ ܟܹܐ ܥܲܪܩܸܠ؛ ܘܐܲܠܵܗܵܐ ܒܝܼܹܗ. 17ܘܒܐܵܗܵܐ ܦܝܵܫܵܐ ܝ݇ܠܹܗ ܡܘܼܟܡܸܠܵܐ ܚܘܼܒܵܐ ܥܲܡܲܢ؛ ܕܚܘܵܪܦܵܬܘܼܬܵܐ ܗܵܘܝܵܐ ܠܲܢ ܒܝܵܘܡܵܐ ܕܕܝܼܘܵܢ؛ ܣܵܒܵܒ ܐܲܝܟܼ ܕܝܼܠܹܗ ܗ̇ܘ؛ ܗܲܕܟܼܵܐ ܐܘܼܦ ܐܲܚܢܲܢ ܝܼܘܵܚ ܒܐܵܗܵܐ ܥܵܠܡܵܐ. 18ܙܕܘܿܥܬܵܐ ܒܚܘܼܒܵܐ ܠܲܝܬ؛ ܐܸܠܵܐ ܚܘܼܒܵܐ ܟܵܡܝܼܠ ܟܹܐ ܪܲܦܹܐ ܠܵܗ̇ ܙܕܘܿܥܬܵܐ ܠܒܼܲܕܲܪ؛ ܣܵܒܵܒ ܙܕܘܿܥܬܵܐ ܓ̰ܘܼܢܓ̰ܵܪܵܐ ܐܝܼܬ ܠܵܗ̇؛ ܐܝܼܢܵܐ ܗ̇ܘ ܕܙܵܕܹܥ؛ ܠܹܐ ܝ݇ܠܹܗ ܡܘܼܟܡܸܠܵܐ ܒܚܘܼܒܵܐ. 19ܐܲܚܢܲܢ ܡܲܚܸܒܲܚܠܹܗ؛ ܣܵܒܵܒ ܕܗ̇ܘ ܩܵܕ݇ܡܵܝܬܵܐ ܡܘܼܚܸܒܠܹܗ ܐܸܠܲܢ. 20ܐܸܢ ܐ݇ܢܵܫܵܐ ܐܵܡܸܪ ܕܡܲܚܘܼܒܹܐ ܝ݇ܘܸܢ ܠܐܲܠܵܗܵܐ؛ ܘܣܵܢܹܐ ܠܐܵܚܘܿܢܹܗ؛ ܕܲܓܵܠܵܐ ܝ݇ܠܹܗ؛ ܣܵܒܵܒ ܗ̇ܘ ܕܠܐܲܚܘܿܢܹܗ ܕܗܵܘܹܐ ܚܸܙܝܹܗ ܠܵܐ ܡܲܚܸܒ؛ ܠܐܲܠܵܗܵܐ؛ ܗ̇ܘ ܕܠܹܐ ܝ݇ܠܹܗ ܚܸܙܝܹܗ؛ ܕܵܐܟܼܝܼ ܡܵܨܹܐ ܕܡܲܚܸܒ؛ 21ܘܐܵܗܵܐ ܦܘܼܩܕܵܢܵܐ ܐܝܼܬ ܠܲܢ ܡܸܢܹܗ؛ ܕܟܠ ܕܡܲܚܸܒ ܠܐܲܠܵܗܵܐ؛ ܡܲܚܸܒ ܐܘܼܦ ܠܐܵܚܘܿܢܹܗ.